ابن زعيم المافيا

أنفاسها بقت تقيلة وقلبها بيخبط كأنه هيطلع من صدرها.

صوت الخطوات وقف قدام الباب بالظبط.

سكون.

ثواني عدّت كأنها سنين.

بعدين

تك

مقبض الباب اتحرك ببطء.

داليا لحقت تشد اللحاف على يوسف وتخبي المخدة المقطوعة بسرعة تحت السرير، ومسحت الدم من إيدها في هدومها.

الباب اتفتح سنة صغيرة

وظهر وش نرمين.

ابتسامة باردة وعينين ثابتين بشكل يخوّف.

صحيتي على صوت يوسف؟ قالت بهدوء غريب.

داليا حاولت تسيطر على صوتها
أيوه شكله كان بيحلم.

نرمين دخلت خطوة لجوه وبصت على الطفل.

يوسف كان مرعوب ماسك في داليا بإيده الصغيرة وكأنه شايف شبح.

نرمين لاحظت ده.

ابتسامتها وسعت أكتر.

غريبة كل مرة بيصرخ في نفس المعاد.
وقفت لحظة وبعدين قالت وهي بتبص لداليا مباشرة
تقريبًا في حاجة بتزعجه.

داليا حسّت إن الكلام مش عادي.

كأنه تهديد مش ملاحظة.

قالت بسرعة
أنا هفضل جنبه لحد ما يهدى.

نرمين قربت أكتر

قربت لحد ما بقت واقفة جنب السرير.

وبصت تحت السرير.

قلب داليا وقع.

بس قبل ما نرمين توطي أكتر

يوسف صرخ فجأة
هي دي! هي اللي بتخلّي العفريت يعضّني!

الأوضة اتجمدت.

الصمت بقى تقيل بشكل مرعب.

نرمين بصّت للطفل وبعدين ببطء رفعت عينيها لداليا.

الابتسامة اختفت.

واضح إن الولد محتاج دكتور نفسي قالت ببرود.

داليا ردت بسرعة، بس بصوت فيه تحدي
أو يمكن محتاج حد يبطّل يحاول يقتله.

نرمين سكتت.

ثانية اتنين

وبعدين ضحكت.

ضحكة واطية مرعبة.

خلي بالك يا داليا قالت وهي بتقرب وشها منها
البيوت الكبيرة أسرارها كبيرة.

لفّت وخرجت من الأوضة بهدوء.

الباب اتقفل.

بس الرعب فضل.

يوسف كان بيترعش
هي مش بتحبني صح؟

داليا حضنته جامد
أنا مش هسيبك أوعدك.

لكن جواها

كانت عارفة إن الموضوع أكبر بكتير.

المخدة دي مش لعبة.

دي محاولة قتل مدروسة.

والمصيبة الأكبر

إن اللي عملها مش خايف.

ولا مستعجل.

ولا حتى بيستخبى كويس.

كأنه متأكد إنه مش هيتكشف.

بعد نص ساعة

داليا كانت في المطبخ، بتحاول تفكر.

بلغت الأب؟
طب لو هو نفسه متورط؟
تروح للشرطة؟
ولا تخرج بالطفل وتهرب؟

وفجأة

افتكرت حاجة.

الكاميرات.

لو نرمين عارفة المواعيد

يبقى في حد بيديها المعلومات.

طلعت على غرفة المراقبة.

الكمبيوتر كان شغال.

بدأت ترجع تسجيلات الأيام اللي فاتت.

ساعة اتنين تلاتة

مفيش حاجة.

لحد ما

وقفت عند تسجيل الساعة 210 الفجر.

نفس المعاد.