أطلقت من سنن بقلم روماني مكرم 2

مروان ساب إيد ياسمين بسرعة ورجع خطوتين لورا وهو بيبلع ريقه، وبدأ يتكلم بلباقته المزيفة اللي ضاعت نصها:

“يا حاج صلاح.. أهلاً بحضرتك، بس مش كده.. دي بيوت ليها حرمة، ومينفعش تدخل بالطريقة دي وتاخد مراتي من غير إذني.. ياسمين مراتي وعلى ذمتي وفي بيتي!”

الحاج صلاح قرب منه، وبص له بصه خلت ركب مروان تتخبط في بعضها، وقال بنبرة تقطر هيبة وقسوة:

“بيتك؟ البيت اللي أنا دافع تمن نصه ومجهزه بدم قلبي عشان أصون بنتي؟ والذمة اللي بتتكلم عنها دي، هي الذمة اللي تخليك تستخبى في الأوضة لما أدخل بيتك، وتسمينا فلاحين ومغفلين وإحنا جايبينلك خير أرضنا لحد عندك؟”

مروان وشه اتخطف وبص لياسمين بغضب، وعرف إن المكالمة بتاعة امبارح وصلت لأبوها. حاول ينكر بسرعة وقال بلجلجة:

“يا حاج.. دي ياسمين بتتبلى عليا.. ده كلام حريم ووقيعة، أنا عمري ما أقول كده عليكم.. ده إنتوا أهلي وناسي!”

هنا ياسمين اتكلمت بصوت عالي وواضح وسط ذهول حماتها ومرات أخوه اللي كانوا واقفين على سلم الدور الأرضي يتفرجوا:

“أهلك وناسك يا مروان؟ والبط واللحمة اللي أهلي بيجيبوهم لبيتي وتنزله لأمك وتقول عليا بخيلة وجايبين قليل؟ والدهب اللي أمك كانت بتقولك تخليهم يجيبوه لما أولد؟ إنت مفكرنا مش سامعينكم؟ إنت واخدني عشان طمعان في قرشين أبويا وأرضه، وبتعاملني كأني جارية عندك!”

الحاج صلاح شاور لبنته تطلع برة الشقة وتنزيل مع عمامها، وياسمين نفذت فوراً ونزلت وهي رافعة راسها لفوق.

مروان حاول يجري وراها ويمسكها: “استني هنا! إنتِ مش هتخرجي من هنا!”

لكن عم ياسمين الكبير، راجل عريض المنكبين ووشه قاسي من شمس الغيط، وقف قدام مروان وزقه في صدره زقة رجعته لآخر الصالة وقال بصوت غليظ:

“الزم حدودك يا روح أمك.. الكلمة هنا للحاج صلاح، والراجل فيكم يقرب خطوة واحدة من البنت!”

الحاج صلاح وقف على عتبة الباب، وبص لمروان وبص لشقة أمه اللي تحت، وقال بوضوح شديد سمعته المنطقة كلها:

“بنتي غالية يا مروان.. غالية قوي ومجبتهاش من الشارع عشان يربيها واحد زيك ميعرفش الأصول ولا شبع في بيت أبوه. الخير اللي كنت بتاكله وتذم في أصحابه.. اتحرمت منه ليوم الدين. وبنتي مش هتعتب البيت ده تاني.. والولد اللي في بطنها ده، هيتولد في وسط رجالة وسيد الرجالة يعرفوه يعني إيه أصل وكرم.”