أطلقت من سنن بقلم روماني مكرم 3
الحاج صلاح كان قاعد في صدر الدوار بجلبابه الصوف وهيبته وعصايته في إيده. وبصوت قوي وواضح قال:
“اتفضل يا مروان.. اقعد.”
مروان قعد على طرف الكرسي وجسمه بيترعش، وبص للحاج صلاح وقال بصوت واطي:
“أنا جيت يا حاج صلاح.. وبقولك قدام الناس كلها أنا آسف.. أنا غلطت في حقك وفي حق بنتك وفي حق الخير اللي دخل بيتي.”
الحاج صلاح وقف، ومشي بخطوات تقيلة ووقورة لغاية ما وقف قدام مروان بالظبط، وبص له وقال بنبرة هزت القلوب:
“الأسف ده لربنا يا مروان اللي هتحاسب قدامه على ذل بنتي وأكل خيرنا بالباطل. إحنا فلاحين يا مروان.. الفلاحين اللي كنت بتقول عليهم مغفلين وبتستخسر تاكل معاهم على طبلية واحدة. الفلاحين دول هما اللي شبعوك وعلموك يعني إيه أصول، وهما برضه اللي يقدروا يكسروا مناخير أي حد يفكر يذل بنتهم أو يطمع في حقهم.”
التفت الحاج صلاح للمأذون وقال: “ابدأ يا شيخنا.”
المأذون بدأ يكتب، ومروان بيمضي وهو يده بترتعش. مضى على التنازل عن شقة الزوجية بكامل منقولاتها لياسمين، ومضى على إقرار بعدم التعرض وتنازل عن أي قضايا تخص الولد، ومضى على وصولات الأمانة اللي تضمن حماية ياسمين مدى الحياة.
وفي النهاية.. حط بصمته وقلمه على ورقة الطلاق.
المأذون بصوت جهوري قال: “إن أبغض الحلال عند الله الطلاق.. وبذلك طلقت ياسمين صلاح من مروان عبد الرحمن طلقة أولى بائنة.”
الحاج صلاح خد كل الأوراق وسلمها لمحاميه عشان يقدم التنازل في قضايا الاختلاس والتزوير ويقفل المحاضر، وبص لمروان وقال ببرود:
“ورقك سليم وقضيتك هتتقفل يا مروان.. تقدر تمشي دلوقتي، بس افتكر كويس.. رجلك لو عتبت ناحية بنتي أو ابنها، الوصلات دي هتوديك السجن تالت ومتلت.”
مروان وقف وهو حاسس إنه خفيف وعريان من كل كبرياء، لف ضهره عشان يمشي ويخرج من الدوار وهو واطي الراس والكل بيبص عليه بكسرة وقرف.
لكن قبل ما يوصل لباب الدوار، حماته (أم ياسمين) خرجت من ورا الستارة، وفي إيدها كيس أسود كبير وسمين وتقيل، ورمته تحت رجلين مروان بقوة خلت الكيس يعمل صوت على البلاط.
مروان اتصدم وبص للكيس وبص لأم ياسمين اللي قالت له بمرارة وقوة فلاحين أصيلة:
“خد يا مروان.. دي البطة السمينة اللي كنت بتذم فينا وتقول أهلك بخلاء ومجابوش لأمي وأختي. أهلك أهم.. ودول فلاحين المنوفية الطيبين الكرما.. بنرمي للي زيك الخير تحت رجليهم وبنقولهم شبعوا بطونكم وعينكم الجعانة.. بس بنتنا وكرامتنا خط أحمر!”
